തിരുവനന്തപുരം: മന്ത്രിസ്ഥാനം താന് പ്രതീക്ഷിച്ചിരുന്നില്ലെന്ന് നിയുക്ത പുതുപ്പള്ളി എംഎല്എ ചാണ്ടി ഉമ്മന്. എല്ലാം മാധ്യമ സൃഷ്ടികള് ആയിരുന്നുവെന്ന് ചാണ്ടി ഉമ്മന് പറഞ്ഞു. മന്ത്രിസ്ഥാനത്തേക്ക് തനിക്ക് പ്രതീക്ഷ ഉണ്ടായിരുന്നില്ലെന്നും മാധ്യമങ്ങളാണ് അത്തരത്തില് ഒരു തോന്നല് ജനങ്ങള്ക്ക് നല്കിയതെന്നും ചാണ്ടി ഉമ്മന് കൂട്ടിച്ചേര്ത്തു.
'ആരെ എടുക്കണം എടുക്കേണ്ട എന്നുള്ളത് പാര്ട്ടിയുടെ നിലപാടാണ്. അത് പൂര്ണ്ണമനസ്സോടെ സ്വീകരിക്കുന്നു. ഞാന് പറയാത്ത കാര്യങ്ങള് മാധ്യമങ്ങള് പറഞ്ഞു. നിയമസഭാ തെരഞ്ഞെടുപ്പ് കഴിഞ്ഞപ്പോള് മുതല് ഈ പ്രവണത മാധ്യമങ്ങള് കാണിക്കുന്നു. പാര്ട്ടി ഒരു തീരുമാനമെടുത്താല് എനിക്ക് അത് സ്വീകാര്യമാണ്', ചാണ്ടി ഉമ്മന് പറഞ്ഞു.
15 വര്ഷം മുന്പ് ഇതേ ദിവസമാണ് തന്റെ പിതാവ് മുഖ്യമന്ത്രിയായി സത്യപ്രതിജ്ഞ ചെയ്തതെന്ന് ചാണ്ടി ഉമ്മന് കൂട്ടിച്ചേര്ത്തു. എല്ലാവര്ക്കും എല്ലാ ആശംസകളും നേരുന്നുവെന്നും അദ്ദേഹം പറഞ്ഞു. മുതിര്ന്ന കോണ്ഗ്രസ് നേതാവ് എ കെ ആന്റണിയുമായുള്ള കൂടിക്കാഴ്ചയെക്കുറിച്ചും ചാണ്ടി ഉമ്മന് പ്രതികരിച്ചു. എ കെ ആന്റണിയുമായുള്ളത് കുടുംബ ബന്ധമാണെന്നും പാര്ട്ടിപരമായ കാര്യങ്ങള്ക്കപ്പുറമുള്ള കാര്യങ്ങള് ചര്ച്ച ചെയ്യാനാണ് എ കെ ആന്റണിയെ കണ്ടതെന്നും ചാണ്ടി ഉമ്മന് പറഞ്ഞു.
ചാണ്ടി ഉമ്മന് മന്ത്രിസഭയിലുണ്ടാകുമെന്ന വാര്ത്തകള് പുറത്ത് വന്നിരുന്നു. എന്നാല് ഈ വാര്ത്തകള് ചാണ്ടി ഉമ്മന് സ്ഥിരീകരിച്ചിരുന്നില്ല. അതേസമയം വി ഡി സതീശന് മുഖ്യമന്ത്രിയായും മറ്റ് 20മന്ത്രിമാരും ഇന്ന് സത്യപ്രതിജ്ഞ ചെയ്യും. കോണ്ഗ്രസ് മന്ത്രിമാരായ രമേശ് ചെന്നിത്തല, സണ്ണി ജോസഫ്, കെ മുരളീധരന്, ബിന്ദു കൃഷ്ണ, എ പി അനില് കുമാര്, പി സി വിഷ്ണുനാഥ്, എം ലിജു, റോജി എം ജോണ്, ടി സിദ്ദിഖ്, ഒ ജെ ജനീഷ്, കെ എ തുളസി എന്നിവരും മുസ്ലിം ലീഗില് നിന്ന് പി കെ കുഞ്ഞാലിക്കുട്ടി, പി കെ ബഷീര്, കെ എം ഷാജി, എന് ഷംസുദ്ദീന്, വി ഇ അബ്ദുള് ഗഫൂര് എന്നിവരും ഘടകകക്ഷികളായ സി പി ജോണ് (സിഎംപി), ഷിബു ബേബി ജോണ് (ആര്എസ്പി), അനൂപ് ജേക്കബ് (കേരള ജോണ്ഗ്രസ് ജേക്കബ്), മോന്സ് ജോസഫ് (കേരള കോണ്ഗ്രസ്) എന്നിവരും സത്യപ്രതിജ്ഞ ചെയ്യും.
Content Highlights: Chandy Ommen about the news related to his ministry post